مسرحية اللعبة

اللعبة
المتخيل الأول
(سرداق فى صدره منصة يقف خلفها المرشح حسين بينما يقف بجانبه الهتيف الكبير وخلفهما يقف بعض الهتيفة الصغار وأمامهم يجلس على الكراسة الموزعة بلا نظام بعض أهل القرية بينما يقف فى نهاية السرداق بعض الأطفال الصغار )
حسين :إخوانى وأخواتى لقد رشحت نفسى من أجلكم من أجل مصالح أهل هذه البلدة من أجل الجماهير الكادحة من أجل إيجاد عمل وشقة لكل شاب من أجل رعاية الشيوخ صحيا واجتماعيا من أجل مستقبل أفضل لأطفال البلد
هتيف صغير يعيش حسين بيه رجل العدل
الهتيف الكبير الدايرة لمين
الهتيفة للحاج حسين
أحد الجالسين أنا كناخب لا أقدر على انتخابك قبل أن أعرف ماضيك فى خدمة البلد وقبل أن أعرف البرنامج الذى أعددته
الهتيف الكبير يا أستاذ الحاج حسين ماضيه معروف لكل أهل البلد ولا أحد يجهله
هتيف صغير صح كلامك الحاج أفضاله غرقت البلد
نفس الجالس طيب عاوز أعرف البرنامج بتاعك عشان أقدر أمايز بين برنامجك وبرامج المرشحين الأخرين
حسين البرنامج بتاعى قائم على خدمة كل أفراد الشعب وليس أهل بلدى فقط يعنى أنا أعمل من أجل صالح الوطن الكبير
شاب1 :يعنى بصراحة أنا كواحد من شباب البلد عاوز حاجة فى بلدنا أستفيد منها مدرسة مثلا مستشفى مثلا
حسين إن شاء الله يا شباب البلد كل مشاكل البلد سأحلها بس أعطونى أصواتكم أنا فى هذا الوقت لا أملك سلطة كى أحقق بها حلول المشاكل ولا أملك واسطة حتى يتشرف وزير أو محافظ أو أى مسئول بحل المشاكل إنما لما أدخل المجلس ستكون فى أيدى مفاتيح لحل مشكلات البلد
شاب2 يا حاج حسين المفروض إنك تكون عارف كل مشاكل البلد من الألف إلى الياء عشان تعرف ما هو المطلوب من المسئول اللى هيحل المشاكل يعنى عندك مشكلة المدرسة اللى من الممكن انهيار سقفها بين لحظة وأخرى ومشكلة أرض مركز الشباب اللى بترشح ومشكلة الوحدة الصحية اللى ما عادتش بتصرف حتى الإسبرين وغيرها من المشاكل
حسين الحلول معروفة فحل مشكلة المدرسة الترميم لحد بناية مدرسة جديدة ومشكلة مركز الشباب تعلية أرضه بالردم والوحدة الصحية تكتبوا شكاوى للوزارة وأنا لما أدخل المجلس سأكلم وزير الصحة فى الموضوع
الهتيف الكبير يعيش الحاج حسين حلال العقد
الهتيفة يعيش الحاج حسين حلال العقد
الهتيف الكبير والأصلح مين؟
الهتيفة الحاج حسين
الهتيف الكبير يا حسين يا عود ريحان يا ناجح فى البرلمان
الهتيفة يا حسين يا عود ريحان يا ناجح فى البرلمان
الهتيف الكبير يا أبو مالك يا حبيب كل البلد هينتخبوك يا لبيب
الهتيفة يا أبو مالك يا حبيب كل البلد هينتخبوك يا لبيب
حسين إخوانى أهل بلدى لا تنسوا حسين رمز الميزان
الهتيف الكبير خش وعلم
الهتيفة على الميزان
الهتيف الكبير يا معلم علم
الهتيفة على الميزان
حسين شكرا شكرا أهل بلدى الكرام إن شاء الله ستزدهر هذه البلد على يدى وستكون أفضل بلد ليس على مستوى المنطقة فقط وليس على مستوى المحافظة فقط وإنما على مستوى الجمهورية والمطلوب منكم كى يتحقق هذا الحلم الكبير أن تنتخبونى فأنا خير من يمثلكم
الهتيف الكبير إن الحاج حسين هو الرجل الحر الرجل الذى إذا وعد وفى هو رجل التقوى والبر والورع الرجل الذى عرفتموه شابا مكافحا يخدم أهل بلده والذى عرفتموه كابن بار لهذه البلد والذى عرفتموه شيخا ناضجا ولذا عليكم أيها الأحباب أن تضعوا أصواتكم له
حسين أخر كلامى لكم لا تنسوا الميزان والسلام عليكم ورحمة الله وبركاته
(الهتيف الكبير وهو ينزل من على المنصة وخلفه حسين والهتيفة بإتجاه باب السرداق )حط الكفة على الميزان والحاج حسين هو الكسبان
الهتيفة حط الكفة على الميزان والحاج حسين هو الكسبان
شاب1 عرفت يا عم حسين واحد من أهل النفاق لا يحضر للبلد إلا إذا كان له مصلحة
شاب2 قطعا والناس كل مرة تتلدغ من نفس الجحر
المتخيل الثانى
(داخل مقهى حيث تتوزع الموائد والكراسى توزيعا على شكل صفوف ويجلس على بعض الموائد بعض الشباب والشيوخ بينما يقف خلف منصة عمل الطلبات شاب ويدور صبى كبير بالطلبات على الموائد وفى وسط المقهى يقف ثلاثة من الشباب )
الشاب1 رواد القهوة الكرام لا تنسوا أحمد محمود رمز الفانوس
الشاب2 إنه شاب جرىء ووجه جديد
الشاب 3 (وهو يسير فى إحدى طرقات المقهى موزعا بعض الأوراق )إنه خير من يعبر عن مشاكلكم
الشاب1 أحمد محمود الرجل الطاهر حاصل على الدكتوراه من جامعة فيينا فى طب الأطفال صاحب أبحاث علمية كثيرة منشورة فى الدوريات العربية والأجنبية
شاب فى وسط المقهى طيب صاحبكم البرنامج بتاعه فيه إيه
الشاب2 البرنامج يتضمن تجديد وتحديث الوحدات الصحية إنشاء مشروع لجمع القمامة فى كل قرية وكل حى بحيث لا يتكلف مائة ألف جنيه
الشاب 1 إن مشروع جمع القمامة أيها الإخوة عبارة عن عربة فنطاس تدور فى البلد لجمع المياه القذرة لترميها فى المصارف وجرار بمقطورة يدور صباحا لجمع التراب ويذهب لمجمع القمامة لوضعه هناك ومن يريد ردم بيته يأخذ التراب من المجمع ومن يريد ردم بركة يأخذ التراب من المجمع بينما يدور الجرار ليلا لجمع القمامة الورقية والمعدنية والزجاجية والطعامية كل نوع فى كيس ثم يوضع فى المجمع كل نوع فى جانب على أن تذهب القمامة الورقية لمصنع الورق والمعدنية لمصانع المعادن والزجاجية لمصنع الزجاج والطعامية لمصنع العلف ومن ناتج بيع القمامة يدار المشروع
الشاب 2 هذا أحد مشاريعه التى تتغلب على مشكلة القمامة
شاب فى جانب من المقهى عاوزين نعرف ماذا سيعمل لبلاد الدايره ؟
الشاب3 إن مشاريع أحمد محمود التى سيحاول تنفيذها بإذن الله هى مشروع القمامة بحيث يدفع الأهالى جزء والحكومة جزء ومشروع ردم البرك بواسطة الشباب ومشروع تشجير الطرق والشوارع ومشروع إنشاء حدائق فى أماكن البرك بعد الردم ومشروع تجديد الوحدة الصحية عن طريق دفع الأهالى لجزء والحكومة لجزء
الشاب1 إنه رجل حر إنه منكم وإليكم لا تنسوا رمز الفانوس
الشاب 3 أحمد محمود يقول لكم أعطوا صوتكم لمن يستحقه أعطوا صوتكم للمرشح الذى يعبر عن آمالكم أعطوا أصواتكم لرجل العلم أعطوا صوتكم لمن يقدر على مواجهة الظلم أعطوا صوتكم للرجل الذى يقول لا لكل خطأ
شيخ فى وسط المقهى أحمد محمود صاحبكم ماذا فعل لأهل الناحية؟
الشاب1 رمز الفانوس أحمد محمود كل ما استطاع فعله هو الكشف على الأطفال الفقراء بلا مقابل أحمد محمود ليس صاحب سلطة حتى يستطيع عمل كل شىء إنه يعمل ما يقدر عليه ويكفى أنه يحارب الأمراض ويحارب الظلم بإرسال الشكاوى للجهات المختصة
الشاب 2 لكن لكى يستطيع أن يعمل أكثر وأكثر لابد أن تعطوه ثقتكم وعندما يكون فى المجلس سيطلب لبلاد الدايرة ما تريد وسيعمل بيده معكم لتعمروا بلاد الدايره
شاب فى جانب من المقهى يعنى ما فيش مرشح فى العالم دى كلها بيقول سنطلب تزويد مرتبات الموظفين الغلابة
الشاب2 الموظف فى برنامج أحمد محمود موجود حيث سيقترح على المجلس تزويد مرتبات الموظفين لتتناسب مع أوضاع الغلاء العام فى البلد
شيخ فى جانب من المقهى ووزير المالية سيرد ويقول ما فيش اعتمادات زايدة عشان نزود المرتبات وسيقول ما أنا كمان موظف وعاوز المرتبات تزيد والزيادة مقررة فى الميزانية
شاب فى وسط المقهى طيب ما دامت الإقتراحات معروفة والرد معروف يبقى الإنتخابات ما لهاش لازمه وبتتعمل صوره عشان الحكومة تمشى أمورها
الشاب 3 بسم الله الرحمن الرحيم "ولا تكتموا الشهادة ومن يكتمها فإنه آثم قلبه "صدق الله العظيم أخى الناخب اذهب للإنتخاب وضع صوتك فإنك بذلك تضيع فرصة التزوير على المزورين وتضيع على البلطجية ومحترفى الإجرام فرصة وضع المجرمين فى مجلس الشعب حتى لا يصبح لهم وضع قانونى يحميهم من المحاكمة على جرائمهم
شاب فى وسط المقهى يا عم روح نام هوه التعريس طلع بر مصر
الشاب1 يكفى أن تنكر التعريس بصوتك حتى يعرفوا أن الشعب لم يزل حيا وأنه قادر على التغيير فى أى لحظة يريد التغيير فيها
الشاب3 تعالوا نشوف تجمع ثانى سلام عليكم (يخرج الثلاثة من أحد أبواب المقهى )
شيخ فى وسط المقهى شوف يا جدع بيقول الشعب هوه فين الشعب ؟ما يعرفش إن الشعب مات ولبسوه الكفن ودفنوه من زمان
الجالس بجانبه شعب إيه اللى أنت جى تقول عليه أنت تعرف موت الشعب يعنى إيه
نفس الشيخ إحنا أموات
المتخيل الثالث
(حجرة كبيرة فى بيت ريفى بها مجموعة من الكنب وأمام الكنب خوان كبير وعلى إحدى الكنبات يجلس أحمد على مرتديا جلبابا أبيض اللون وهو ذو لحية صغيرة ويدخل عليه الصحفى محمد أحمد معه مسجل )
محمد السلام عليكم
أحمد(مصافحا الصحفى)وعليكم السلام ورحمة الله تفضل بالجلوس
محمد مرحبا مرحبا
أحمد جئت لإجراء حديث صحفى معك عن الإنتخابات بإعتبارك تمثل أحد فصائل ما يسمونه الحركة الإسلامية وهو الفصيل المتشدد
محمد نعم هو الفصيل المتشدد فى إقامة الحق تفضل
أحمد (يشغل جهاز التسجيل )السؤال الأول لماذا لا تدخلون المعركة الإنتخابية وفرصتكم كما يقول المعتدلون منكم كبيرة فى الفوز ؟
محمد لأننا لا نثق فى السلطات الحاكمة ولأن السنة أى القانون الإلهى يقول لا يمكن أن يصل المسلمون لتحكيم شرع الله إلا عن طريق الحرب فمثلا سيدنا محمد(ص)
أحمد عليه الصلاة والسلام
محمد لم يتمكن من إقامة الشرع فى مكة ولكنه تمكن من تحكيمه فى المدينة بالحرب وعامة نحن نعتبر أى سلطة حاكمة خائنة لا تقيم للمواثيق والعهود قيمة كما يقول تعالى "لا يرقبون فى مؤمن إلا ولا ذمة " كما أن مجلس الشعب أو غيره من الأسماء مهمته الرئيسية هى التشريع والمشرع فى الإسلام واحد هو الله فلو شرعنا أى تشريع لكنا شركاء لله الذى هو المشرع الوحيد "شرع لكم من الدين ما وصى به نوحا والذى أوحينا إليك وما وصينا به إبراهيم وموسى وعيسى "وهو لم يترك شىء أى قضية إلا جعل فيها تشريع له كما قال لنبيه (ص)"وأنزلنا عليك الكتاب تبيانا لكل شىء " وكما قال "ما فرطنا فى الكتاب من شىء " فلو شرعنا لكان هذا من الكفر فكيف تريد منا أن نصبح كفرة ؟
أحمد هل يعنى ذلك أنكم لا تعترفون بالديمقراطية ؟
محمد نحن لا نعترف بالديمقراطية لأننا أولا لا نجدها مباحة فى التشريع الإلهى وثانيا لأن الديمقراطية مادة ليس لها شكل ثابت فهى كالهواء فهناك الديمقراطية المباشرة وغير المباشرة والديمقراطية السياسية والديمقراطية الماركسية والديمقراطية الموجهة والديمقراطية الإجتماعية المعتدلة فبأى واحدة منهن نعترف ؟وثالثا لأن كل مفاهيم الديمقراطية السابقة تقوم على فكرة الملأ أى كبار القوم الذين يحكمون وأما الشعب فلا نصيب له فى الحكم وهناك عيوب كثيرة فى المفاهيم السابقة لا داعى لذكرها
أحمد ما هو البديل للديمقراطية عندكم ؟
محمد البديل هو الإسلام ولا أقول الشورى لأن الشورى جزء من الإسلام ولأن هناك خلط فى الأذهان حيث يقولون أن الشورى هى بديل الديمقراطية فإننى سأحدثك عن الشورى
أحمد تفضل
محمد الشورى عندنا قسمين الأول الشورى العامة ويقصد بها حق كل البالغين العقلاء فى اختيار حكامهم من الخليفة ومرورا بولاة الولايات ومحافظى المحافظات وحتى رؤساء
القرى والمدن وحتى رؤساء الأحياء وكذلك رؤساء العمل فى الإدارات والمصالح المختلفة والإختيار يقوم على أساسين الأول أن يكون المختار عالما بأحكام الإسلام وعلوم العصر والثانى ألا يكون المختار للمنصب قد قال للناس اختارونى وإنما الناس هم الذين يرشحون فلا ولاية لمن طلبها
أحمد وماذا عن القسم الثانى ؟
محمد الشورى الخاصة ولا نقصد أنها مقصورة على طائفة معينة كما فى الديمقراطية وإنما المراد بها إقامة مجلس شورى لكل وزارة وهو يتكون من العاملين بالوزارة وكل من يهتم بعملها ويريد المساهمة بالإقتراحات والإختراعات فى عملها وكل مجلس ينقسم لجماعات كل جماعة تختص باختصاصها الذى تعمل فيه وتصدر القرارات من كل جماعة فى مجال اختصاصها وبذا نضمن أن أهل التخصص هم أصحاب القرار كما نضمن بذلك مشاركة الناس جميعا فى إصدار القرارات كما أن التصويت لا علاقة له بإصدار القرارات لأنها تصدر بناء على موافقتها للشريعة من عدمه وهذا ما يقرره القضاة فى مجلس شورى القضاء بناء على نصوص الوحى وليس على عدد الأصوات
أحمد ألا ترى تطبيق هذا صعب ؟
محمد كلا
أحمد ألست ترى أنكم تدافعون عن قضية خاسرة ؟
محمد ماذا تقصد بذلك؟
أحمد أقصد أنكم للسلطات الحاكمة مثل الفأر الذى يحاول أن يجثم على الفيل ليقتله
محمد لسنا فيرانا وليسوا فيلة وإنما نحن وهم قط وقط يتهارشان بينما بقية القطط نائمة أقصد الشعب ونحن نريد أن يصحو الشعب لكى يأخذ حقوقه ونحن فى أشد الحاجة لصحوة الشعب وعامة ولو كانت السلطات الحاكمة عددها كبير فالقاعدة عندنا "كم من فئة قليلة غلبت كثيرة بإذن الله "
محمد ألا يمكن وجود صلح بينكم وبين السلطات الحاكمة ؟
أحمد ممكن بشروط
محمد وما هى هذه الشروط؟
أحمد الأول تحكيم الشرع الإلهى والثانى إلغاء كل المعاهدات والقوانين المعارضة لأحكام الشرع والثالث أن يتوب أفراد السلطة لله عن طريق ترك مناصبهم وتقديم كل الأموال التى أخذوها بغير وجه حق للخزانة وطلب العفو من المظلومين من الشعب
محمد أليس من بين شروطكم تسليم السلطة لكم؟
أحمد كلا ولكننا نعتقد أن وجودنا فى المناصب أفضل لوجود العلم اللازم لإدارة البلاد معنا
محمد ألا يمثل هذا قفزا للسلطة ؟
أحمد نحن لن نتسلط وإنما سنسلط أحكام الشرع علينا وعلى الكل وعلى الناس أن يضربوا الحكام المخالفين للشرع بالرصاص ما لم يتوبوا والسلطة ليست أمنية أحد منا لأنها أمانة وستكون يوم القيامة خزى وندامة
محمد قد يكون هذا كلام للنشر والدعاية؟
أحمد الخيبة هى أن الشعب غافل لو أن الشعب يعرف حقه ويدافع عنه لن يوجد حاكم ظالم إننا نريد فى عهد تحكيم الشرع صحوة الناس ليدافعوا عن حقوقهم ضد أى قوة مهما كانت
محمد هل يعنى أن الشعب لو كان واعيا ستتركون السلطة ؟
أحمد نحن جزء من الشعب لو اختارنا الشعب فيما بعد فسنظل كما يريد ولو اختار غيرنا فسنترك المناصب راضين
محمد (يضغط زر الإيقاف فى المسجل )أشكرك (يقوم من مكانه )
أحمد (يقف )لا يمكن أن تمشى قبل الغداء يا رجل
محمد سامحنى خلفى مشاغل أخرى
أحمد لا أحب أن أكرر الدعوة ولا الإلحاح فاجلس
محمد سامحنى
أحمد(وهما يسيران معا)مع السلامة
المتخيل الرابع
(جزء من أحد شوارع قرية ما وفيه تظهر ملصقات دعائية للمرشحين وأمام مصطبة بجوار أحد البيوت يقف الحاج إبراهيم وخلفه الهتيفة والسنيدة التابعين له بينما يجلس بعض الرجال على المصطبة وعلى مبعدة منهم وقف بعض الأطفال
الهتيف الكبير تنتخبوا مين؟
الهتيفة الرجل الصالح
الهتيف الكبير الأصلح مين؟
الهتيفة الحاج إبراهيم
الهتيف الكبير الحاج إبراهيم رمز الطهارة والنقاء
محمدين هتعمل إيه للبلد يا حاج إبراهيم؟
الحاج إبراهيم إن شاء الله هاجيب المجارى للبلد وإن شاء الله بإذن الله هازود عدد الأتوبيسات بتاعة البلد وكل الحاجات المعطلة هتشتغل
سلامة انتخب مين معاك يا حاج
الحاج عليك وعلى السمكة الرمز بتاعى وعلى العين بتاعة الحاج رمضان
الهتيفة حط الحلة على البابور والحاج إبراهيم هو المنصور
الهتيف خش وكل السمكة خش وعلم على السمكة
أحمد يا حاج ما هو الحاج حسين ابن البلد برضه وهو أولى من الحاج رمضان الغريب عن البلد
الحاج يا فالح بقى له دورتين فى المجلس عمل إيه للبلد
أحمد يا حاج المثل بيقول جحا أولى بلحم توره والحاج حسين من لحمنا برضه
الحاج ما هوه يا فالح المثل ده ما ينفعش لأنه بيدعوا الناس لانتخاب بتاع الحزب بتاعه وعاوزه يدخل المجلس بدالى
سلامة الحاج حسين ما عملناش حاجة فاحنا ننتخب الحاج رمضان على الأقل بيخدم بلده وعمل لهم حاجات كثيرة واللى بيخدم بلده أحسن من اللى ما بيخدمش
الهتيفة السمكة كلت الميزان والسمكة كلت الميزان
الهتيف الكبير وحبيبكم مين؟
الهتيفة أبو حسنين
الهتيف الكبير وراجلكم مين؟
الهتيفة أبو حسنين
الحاج أنا عاوز يا رجاله كل واحد يطلع حريمه ينتخب عشان نضمن الفوز
محمدين يعنى النسوان هتنتخب زى الرجاله
الحاج طبعا المره زى الرجل هيه لها صوت ولك صوت
أحمد طيب يا حاج إزين النسوان هتعرف اللجان اللى هتنتخب فيها ؟
الحاج إن شاء الله كل واحد وكل واحدة من أهل البلد هيعرف لجنته أنا كلفت شوية شباب يكتبوا أسامى أهل البلد ولجانهم كل واحد اسمه مع اسم لجنته فى ورقه وهمه هيفوتوا على البيوت عشان يعرفوا كل واحد وواحدة لجنتهم والرمز اللى هيعلم عليه
أحمد يا حاج أنته عارف إن الحاج حسين هيقفل اللجان
الحاج لا يا فالح لن يقدر
احمد ازاى يا حاج وأنته عارف أنه راجل الحكومة
الحاج أنا يا واد خططت للعملية تخطيط ما يخرش الميه اشتريت شوم بخمسة آلاف جنيه ووزعته على الشباب الجدعان وكمان صلحت المسدسات والبنادق وجبت لهم رصاص ووزعتهم على الناس بتوعى عشان ساعة ما حد يقول هنقفل اللجنة ينضرب وساعتها لن يقدر فتوات الحاج حسين على فتح بقهم
الهتيفة حط السمكة فى التقلية الحاج إبراهيم صاحب الشعبية
الهتيف الكبير الحاج حسين ما ينفعناش
الحاج بلاش الكلام ده عشان ما حدش منهم يغلط فيه
واحد من الهتيفة أنا سمعت الهتيفة بتوعه وهمه بيغلطوا فيك
الحاج إن كان كده اغلطوا زيهم ما فيش حد أحسن من حد
الهتيفة الحاج إبراهيم يا بلاش الحاج حسين ما ينفعناش دورتين يا حسين من غير إخلاص يبقى يوم الإنتخاب يوم الخلاص يا حسين قول الحق أنته خدمت البلد ولا لأ يا حسين ما تقول الحق أنته ساقط ولا لأ
الحاج خلاص يا جماعة ما حدش ينسى السمكة
واحد من الهتيفة لا تنسوا السمكة لا تنسوا أخيكم الحاج إبراهيم
الهتيف الكبير لا تنسوا الحاج إبراهيم رجل المعروف رجل الإحسان رجل العطاء
الحاج لا تنسوا السمكة يا رجاله سلام عليكم (ينصرف وخلفه الهتيفة )
الجالسون وعليكم السلام
المتخيل الخامس
(قاعة رحبة رصت الكراسى فيها بجانب الجدران وفى أحد جوانبها توجد بعض الكراسى المذهبة العالية وفى الجانب الأيمن مدخل القاعة يجلس المرشح إمام على كرسى مذهب ومعه أنصاره بينما يجلس بعض الشباب والشيوخ على الكراسى بجانب الجدران )
إمام عاوزكم تلفوا البلد شارع شارع وتنبهوا على الناس لازم ينتخبونى وتعرفوهم الرمز بتاعى المسدس
الهتيف الكبير يا إمام بيه أنا سهرت امبارح أفكر فى اللى هنهتف وألفت الهتاف الجميل اللى بيقول إمام بيحبك يا بلد عشان يجيب المجد التليد
إمام حاجة جميلة تنفع
أحد الشباب بجوار الحائظ الأيسر بصراحة فيه هتاف ألفته بس خايف أقوله
إمام لا تخف وقل يمكن يكون هتاف خير وبركة
الشاب بدون زعل
إمام زعل إيه يا عم قل وخلصنا بقى
الشاب الهتاف هو يا إمام نام وارتاح وبشر أمك بالنجاح
هتيف نقول أبوك أحسن من أمك
إمام لا لا أمك هنا أحسن من أبوك لأنها ملفتة للنظر وهتخلى الناس تنبسط وبعد ما تنبسط هتنتخب اللى بسطها
هتيف أخر وخد عندك الهتاف ده يا حماده قول لأبوك أهل البلد هينتخبوك
أمام سيبكم من الهتافات قل لى يا شيخ محمود عملت إيه فى الموضوع اللى كلفتك بيه
الشيخ محمود بجوار الحائط الأيسر يا إمام أنا رحت لنسيبى فى بلده واتفقت معاه على أنه هيخلى عيلته كلها يحطوا أصواتهم للمسدس وكمان هيكلم قرايبه فى البلد عنده عشان يحطوا أصواتهم كمان ليك
إمام براوه عليك وأنته يا عم على عملت إيه مع العمدة قريبك
على بجوار الحائط فى المواجهة يا إمام الراجل طلع شهم وقال إنه هيقفل اللجان فى البلد لصالحك بس بشرط تروح البلد عنده وتقول لهم كلمتين حلوين عشان ما حدش يكلم ويعارض
إمام زى إيه كده يا عم على
على الراجل قال لى يقول أنا هأعمل مركز شباب للبلد وكشكين نور
إمام يعنى لازم أروح عشان الكلمتين دول
على يا بنى ما دامت هتجيلك مصلحة من ورا المشوار ده يبقى لازم تروحه عشان تضمن إن المصلحة دى بقت فى جيبك
إمام كلامك صح يا عم على وهمه كلمتين لا همه هيودوا ولا هيجيبوا
الهتيف الكبير اسمع يا إمام بيه أنا اكلمت النهارده مع واحد من أنصار جمال أبو طه فى موضوع التربيط بينك وبينه
إمام وقال إيه
الهتيف الكبير قال لى إن جمال مستعد إنه يقفل بلده لك وليه وعليك إنك تقفل البلد هنا لك وليه وقال إن الحكومة منعت التقفيل يبقى المندوبين بتوعه هيخلوا الناس يحطوا أصواتهم لك وله والمندوبين بتوعنا يعملوا زيهم هنا
إمام وأنا موافق بس نكتب الكلام فى عقد واللى يخل بالعقد يدفع عشرة آلاف جنيه
واحد من الهتيفة يا عم إمام عاوزين فلوس عشان الورق بتاع الدعايه والقماش اللى بنعلقه فى بلاد الدايره وكمان عشان الناس اللى عطلت مصالحها وعماله تلف معانا بتدعى الناس لانتخابك وكمان عاوزين فلوس عشان العربيات اللى بتلف بالرجاله
إمام هيه الفلوس اللى معاكم خلصت ولا إيه
نفس الهتيف طبعا وعاوزين كمان عشان الدعايه لما بتكتر بتعمل تأثير فى الناس
إمام اسمع أنا معاى دلوقتى ألف جنيه بس(يمد يده فى جيبه ويخرجهم مناولا إياهم للمتحدث الذى يمد يده ويأخذهم )عاوزكم تصرفوا بحساب
الشيبخ محمود هوه أنته فلست يا إمام ولا إيه
إمام فلست والله يا حاج وعاوزك تلم من القرايب الأغنيه اللى قاعدين معانا هنا واللى مش قاعدين خمسة ولا عشرة تلاف جنيه نمشى بيهم الحال لحد ربنا ما يفرجها وندخل المجلس
الشيخ محمود طيب هنلم الفلوس ما أنته ابن العيله ونجاحك فى الإنتخاب هو نجاح لينا كلنا فى العيلة
إمام عاوز كل واحد يقوم يعمل اللى عليه دلوقت (يخرج الكل )
المتخيل السادس
(شجرة جميز بجوار الطريق المرصوف يجلس تحتها جماعة من الرجال مختلفى الأعمار بينما يقف المرشح أحمد المصرى ممسكا بقيادة عجلته العادية التى يوجد فى مؤخرتها لوحة قماش معلقه مكتوب عليها أحمد المصرى مرشح الغلابة الغلبان رمز الفم وتقف بجانبه على الأرض ابنته الصغيرة )
أحمد السلام عليكم
الجماعة وعليكم السلام ورحمة الله وبركاته
أحمد أحمد المصرى مرشح فى الإنتخابات
الجماعة أهلا وسهلا
أحمد جيت هنا عشان أعرف طلبات أهل البلد وعشان أطالبكم بانتخابى
أحد الشيوخ والله البلد يا بنى طلباتها مش كتير
أحمد إيه هيه
نفس الشيخ عاوزين مدرسة اعدادى ومكتب بريد ومكتب تليفون ومستعدين نساهم بالأرض والفلوس إن لزم
أحمد دى طلبات مش كبيرة وعلى العموم إن شاء الله لما أدخل المجلس سيكون أول ما أفعله هو تحقيق مطالب البلد وبلاد الدايره
أحد الشيوخ يبقى كتر خيرك
أحمد يا جماعة أنا واحد زيكم مش غنى ولا حرامى ولا ورايه الحكومه والله أنا غلبان زيكم
أحد الشباب الغلابة لهم رب كريم
أحمد والله يا جماعة أنا دخلت الإنتخابات عشان أدافع عن الغلابة اللى زى وزيكم ومش هتصدقوا لو قلتلكم
أحد الشيوخ قول مصدقينك
أحمد أنا يا جماعة (يضع يده على وجهه ويسحبها كأنه يمسح دموع تجرى على خديه)
أحد الشباب لا تبكى يا أخ
أحد الشيوخ الذى يأخذ هو الذى يعطى فلا تحزن
أحمد إحنا بعنا إيه يا بت
براءة بعنا التليفزيون
أحمد وبعنا كمان إيه يا بت
براءة بعنا الكنب بفرشه
أحمد وبعنا إيه تانى
براءة بعنا السرير والدولاب يا با
أحمد يعنى يا جماعة أنا مفيش على البلاطة عشان أدفع ثمن الترشيح
أحد الشيوخ ربك يعدل الأحوال
أحمد أنا أملى كبير فى ربنا وفيكم يعنى المفروض تنتخبونى وتحطوا أصواتكم ليه عشان سبب واحد بس مش عشان أرجع الحاجات اللى بعتها عشان أدخل الإنتخابات
أحد الشباب إيه السبب ده
أحمد عشان أنا واحد منكم زيكم عارف كل شىء عنكم تعبان من كل اللى أنتم تعبانين منه ومفيش حد يحس بالغلبان إلا الغلبان زيه
واحد من الشيوخ كلامك صح
(يخرج بعض أوراق الدعاية الصغيرة من جيب الجلباب ويعطيها لبنته )
أحمد فرقى الورق يا براءة
براءة حاضر يابا (تتحرك الطفلة موزعة أوراق الدعاية على الجالسين)
أحمد يا جماعة لا تنسونى يوم الإنتخاب أحسن لو ده حصل هتبقى مصيبة من كل النواحى أولا هأبقى فقدت عزال بيتى وثانيا هأفقد الثقة فى الغلابة لأنهم هيبقوا فى حالة سقوطى ساقطين مش عاوزين حد فيهم يرجع لهم حقهم
أحد الشيوخ ما تخافش إحنا كلنا اعتبرنا من دلوقت منتخبينك
أحمد مش عارف أشكركم ازين لكن هأشكركم لما أدخل المجلس وأنفذ لكم كل مطالبكم إن شاء الله
أحد الشيوخ بأقول إيه يا أحمد
أحمد قل يا عم الشيخ
نفس الشيخ استنا نصلى العشاء فى الجامع الكبير وبعد الصلاة ندعى الناس عشان ينتخبوك وبعدين تيجى أنته والبنت تتعشوا عندى
أحمد والله فكره كويسه يا عم الشيخ
نفس الشيخ طيب يا له بينا
أحمد ماشى كلامك
المشهد السابع
(قطاع عرضى من ملعب أحد مراكز الشباب يظهر فى خلفيته المرمى حيث يجلس حوله بعض الشباب ويقف بعض أخر بينما يستند أحدهم على أحد قوائم المرمى كما يظهر فى خلفية المرمى سور المركز )
سعيد مين اللى هيروح ينتخب
أحمد يا عم سيبك بلا انتخابات بلا كلام فاضى أحسن حاجه فى يوم الإنتخابات إنه يوم إجازة نرتاح فيه من وش المدرسة والمواصلات
على الإنتخابات دى بتاعة الناس اللى فوق الناس الأغنيا ويقول لك ديمقراطية وكل مواطن له الحق فى ترشيح نفسه طيب ازين أدخل الإنتخابات وأنا لا أملك تأمين دخول الإنتخابات كمرشح ولا أملك حق المواصلات اللى هأسافر بيها لبلاد الدايره ولا أملك حتى فلوس لعمل يافطة واحدة أو أطبع شوية صور أو أجيب شوية غره
سعيد تقصد إن الفقرا اللى زينه كده بيضحكوا عليهم ويقولوا لهم أنكم متساويين مع الكبار مع أن ما فيش تساوى لأننا لا نملك وهم يملكون
إبراهيم (المستند على قائم المرمى)عاوز أعرف كم مرشح غلبان دخل الإنتخابات كل اللى دخلوا يا إما أغنيا ويا إما من عائلات كبيرة ويا إما من الحراميه اللى جمعوا فلوسهم من الحرام
على طيب وإيه النظام الصح
شعبان النظام الصح الذى لا غبار عليه إن كل واحد من الناس يكتب فى ورقه الترشيح الإنسان اللى هوه يرى أنه أحسن واحد يراعى مصالح الكل وبالطبع النظام ده ليس فيه أحد يتقدم للترشح ويقول رشحونى أو انتخبونى وإنما الناس هيه اللى تختار وعشان نضمن عدم التزوير يجب إننا نحط البصمة على ورقة الترشيح وبالنظام ده سنختار الأفضل ولكن عشان نضمن اختيار الأفضل لابد من توعية الناس بأن فيه شرطين يجب أنهم يتوفروا فى المختار همه أن يكون عالم بدينه وعلوم الدنيا وأنه يكون صاحب صحة قوية عشان يقدر يروح ويجى ويقابل الناس فى أى وقت ويشتغل معاهم
إبراهيم والله النظام اللى بتقول عليه أحسن ألف مرة وهنضمن بيه إن حكامنا همه أعدل ناس فينا لأن اللى هنختاره لن يكون راغبا فى السلطة مطلقا
على أنا مش عارف الناس الوحوش بتتقاتل على دخول المجلس ليه
أحمد طبعا عشان يقدر كل واحد منهم يسرق وينهب أموال الناس وعشان يقدر يظلم الناس دون أن يقدم للمحاكمة كلهم شوية جزم
شعبان عاوزين تعرفوا همه كده ولا لأ تعرفوهم من عدم مطالبتهم الحكومه بدفع مرتبات الناس متساوية بمرتباتهم يعنى ما فيش مساواة واحد قاعد على كرسى يقبض 70 جنيه فى القعدة ساعتين والموظف الغلبان يقعد يشتغل شهر بحاله عشان يقبض فى نهاية المطاف السبعين ملطوش (هذا الكلام مكتوب فى أواخر الثمانينات من القرن العشرين الميلادى)
أحمد والله كلامك صح عندك أنا مثلا اقعد أشرح للعيال الدروس يوميا وكل يوم أمشى ستة كيلو وفى نهاية الشهر اقبض السبعين ملطوش اللى ميكفوش عيل من عيال الباشوات يوم ولا اثنين
شعبان والحل المطلوب لمشكلة المرتبات سهل ولن يكلف الحكومة شىء
على إيه الحل الحلو ده ؟
شعبان الحل هو إن كل واحد يقبض زى التانى ما فيش فرق بين الرئيس والغفير ولا بين رئيس مجلس إدارة ولا فراش ولا مدير ولا ساعى ولما كل واحد يقبض زى التانى ما فيش حد هيحس بالغلا لأن كل واحد هياخد ثلاثة أضعاف مرتبه طبعا عدا الكبار اللى هيخس مرتبهم
أحمد كلام جميل بس نسيت المساواة ستجعل الحافز يقل مما يجعل الإنتاج يقل وسيساعد على الأمية ما دام الكل فى النهاية متساوى
شعبان عاوزك تعرف إن المرتب ليس له صلة بالعمل يعنى المرتب حاجة لازمة لكل إنسان عشان يقدر يأكل ويشرب ويلبس ويسكن ويصرف على بيته أما الإنتاج فالعقاب الصارم بالجلد والضرب بدل لفت النظر والخصومات سيجعل الإنتاج يرتفع أضف لذلك أن التساوى سيجعل الإنسان ينتج ولن يقول على قد فلوسهم وأما الأمية فلن تكثر لأن الناس تؤمن بأهمية العلم للحياة
سعيد يا جماعة الحلول كتيره بس المهم تغيير هذا الواقع المر ثم بعد ذلك تطبيق الحل الأفضل
على ستظلون تحلمون بالتغيير ما دمتم تتكلمون
أحمد إذا كان الواحد مننا فقد القدرة على أن يغير فلن يفقد القدرة على أن يحلم بالعدل يحلم بمسكن ووظيفة وزوجة ومشاركة فى بناء الدولة
على الذين يريدون التغيير وسيقدرون عليه لا يتحدثون ولا يعرفون لغة الحوار لأنهم يعرفون أنه حوار الطرشان
شعبان أصبح الكلام من الناس أشبه بنباح الكلاب التى ترى من معه عصا فتبتعد عنه وهى تنبح
إبراهيم المهم أن الظالمين هم أنفسهم مظلومين
أحمد حلوه دى فسرها
إبراهيم المقصود إن الظالم يظلم غيره وفى نفس الوقت يظلم نفسه لأنه بظلمه للغير سيدخل نفسه النار
سعيد أنته صدقت إن فيه جنة وفيه نار
إبراهيم أمال إيه
سعيد يا عم كلام بيضحكوا بيه على الفقرا عشان يسكتوا على ظلم الأغنيا
إبراهيم طيب لما ما فيش جنة ولا نار بتصلى ليه
سعيد جايز يبقى فيه تبقى تنفعنا
إبراهيم جايز ولا فيه
سعيد طبعا فيه جنة ونار وإلا لقتلت كل الأغنيا دون خوف من شىء
شعبان سيبكم من الكلام ولنعمل وليكن أول ما نبدأ به تحريض الناس على عدم الذهاب للجان الإنتخاب حتى لا يقعوا فى ذنب إدخال جاهل أو حرامى مجلس الشعب
على من غير ما تحرض ما فيش حد هيروح مراكز الإقتراع إلا أهالى المرشحين وحواشيهم والناس من زمان رافضه حكاية الإنتخابات
شعبان ونسبة الحضور 90%
أحمد المقصود نسبة الغياب
شعبان طيب يا له نبتدى التقسيمه
المتخيل الثامن
(قاعة واسعة بها مقاعد وثيرة فى بيت جمال أبو طه وعلى بعضها يجلس المرشح إمام والهتيف الكبير التابع له والهتيف الكبير التابع لجمال )
هتيف إمام البيه اتأخر
هتيف جمال زمانه نازل أصله متعود على السهر والصحيان متأخر
إمام قم استعجله
(يقوم هتيف جمال ويتحرك خارج القاعة )
هتيف إمام بصراحة يا إمام بيه جمال بيه ده راجل أخر فخفخه عنده أراضى وشويه شركات وعنده حتة مرة حلاوة إيه وجمال إيه
إمام ليه حق يطنشنا ما هوه احنا مش قد المقام
هتيف إمام مقامك محفوظ يا إمام بيه
إمام يعنى على كده ممكن يخل بالعهد
هتيف إمام تقصد إيه
إمام يعنى راجل عنده فلوس بالكوم يبقى يقدر يضحك علينا ويخل بالإتفاق ومش مهم يدفع الفلوس ما دام هيدخل المجلس
هتيف إمام الراجل كلمة يا إمام بيه وأنته عارف إن السمعه لها قيمتها
إمام عند مين فى الزمن ده
هتيف إمام حتى لو فرضنا إن هوه خل بالإتفاق يبقى أنته ما خسرتش حاجه
إمام تقصد إيه بكده
هتيف إمام أقصد إنك هتلم المصاريف اللى أنته صرفتها وزياده وهتكسب شهرة بين الناس وممكن بعد كده لا قدر الله إن ما حصلش نصيبب تبقى تدخل الإنتخابات اللى بعدها وأنته عندك خبرة
(يدخل جمال ومعه الهتيف التابع له من الباب اليسر)
جمال معلش يا إمام بيه اتأخرت عليك
إمام أهلا يا جمال بيه (يقف إمام ويصافحه )
جمال اتفضلوا اجلسوا(يجلس الكل )
إمام إيه رأيك فى الموضوع اللى عرضه عليك حموده
جمال موضوع كويس نفيد ونستفيد
إمام يعنى موافق على شروط الإتفاق
جمال موافق طبعا بدون اعتراض
إمام يبقى فاضل نجيب شهود على الإتفاق من غير طرفى وطرفك عشان تبقى الأمور تمام تحب نجيب مين
جمال أنته كبرت الموضوع أوى لا شهود ولا حاجة
إمام تقصد إيه بكده
جمال أقصد إن العملية سهله أنا واثق فيك وعشان كده سأكتب لك شيك بالمبلغ يبقى معاك لحين ظهور النتيجة وساعتها نتحاسب ومش ضرورى أنته تكتب لى شيك
إمام وليه ما اكتبش شيك
جمال عشان أنا واثق منك مليون فى الميه وأما أنته فقد تكون ثقتك فيه منعدمه وعشان أنا هأستفيد منك أكثر مما هتستفيد أنته ثم أنا ما أحبش فى موضوع بسيط زى الإتفاق ده اخد وقت كتير لأن ورايه أشغال كتير
إمام ماشى كلامك (يخرج جمال من جيب سترته دفتر الشيكات ويضعه على الخوان ويكتب شيك بعشرين ألف ثم يناوله لإمام الذى يمد يده ويأخذه)
جمال بكده تبقى ضمنت حقك يا عم
إمام عداك العيب
هتيف إمام بأقول إيه يا جماعة
إمام عاوز إيه
هتيف إمام يعنى المفروض إننا بدل ما نقعد هنا نقوم نشوف شغلنا يعنى نقوم عشان نوعى الناس كل واحد فى بلده إنه ينتخب إمام بيه وجمال بيه عشان التوعيه تلحق تعمل أثر بدل الوقت ما يفوت وبعد كده نندم على اللى فات
هتيف جمال والله كلامك تمام
إمام نستأذن احنا يا جمال بيه عشان الدعايه
جمال يا راجل لنا غدوة مع بعض بعدين
إمام إن شاء الله بعد النجاح
(يتحرك إمام والهتيفان للخروج)
المتخيل التاسع
(مضيفة كبيرة من مضايف الريف المصرى وهى تتبع نظام المصاطب المتقابلة وفى وسطها يجلس الحاج رمضان مع طائفة من أصحابه )
الحاج رمضان يا محمود يا بنى أنا لم أذنب عندما دخلت الإنتخابات
محمود يا أبى عاوزين نرتاح من الوش
محمد صحتك بالدنيا يا حاج أنته بقيت رجل كبير
الحاج يا ولاد أنا دخلت الإنتخابات عشان أخدم الناس فى البلد وبره البلد
الحاج سيد أبوكم يا رجاله خدام الكل وكل الناس بتقدره وتحترمه وكل ده فى الأخر هينفعكم بعد كده
الأستاذ سمير بصوا للمستقبل يمكن واحد منكم بعد عمر طويل للحاج يبقى يدخل الإنتخابات يبقى معتمد على رصيد أبوه
الحاج سيد صحة الحاج تمام والمجلس بيعالج الأعضاء أحسن علاج
محمود يا جماعه المسأله أكبر من تصوركم
الحاج سيد تقصد إيه
محمود البلد فى الأيام دى فى حالة غليان ومش بعيد المتطرفين يمسكوا البلد وساعتها لن يرحموا أحد ممن شاركوا فى الحكم السابق عليهم
محمد ومش بعيد يفجروا المجلس أو يغتالوا الأعضاء فيه
الحاج رمضان أنتم عارفين يا ولاد أنا لا تبع الحكومه ولا تبع حد أنا راجل بتاع ربنا باخدم الناس عشان أخرتى
الأستاذ سمير أبوكم هوه أفضل واحد فى بلدنا يدخل المجلس ولا يعجبكم إن واحد حرامى أو بتاع حشيش يدخل المجلس
محمود المشكله دى لا تهمنى كل اللى يهمنى راحة الحاج ثم إن البلد مخروبه مخروبه سواء دخلوا المجلس ولا ما دخلوش
الأستاذ سمير دا أنته يائس أوى
محمود كل اللى حصل وبيحصل فى البلد ومع العرب والمسلمين وعاوزنى أبقى عندى أمل فى الناس اللى بيحكمونا
محمد هزايم ورا هزايم ورا هزايم وتنازل ورا تنازل ورا تنازل لما فى يوم هنلاقى نفسنا بننتحر واحد ورا التانى
الحاج سيد هنفرض إن أبوك والناس اللى زيه فى البلد ما دخلوش الإنتخابات فكرك أنته وهوه الفساد هيزيد ولا هيضعف
الأستاذ سمير طبعا الفساد لابد يزيد
الحاج سيد وعليه الهزايم هتكتر ويبقى قعاد أبوكم واللى زيه خسارة وأى خسارة يا ولاد
محمود الفساد ينمو دا صحيح وأبويه واللى زيه عمرهم ما يقدروا يقفوا فى وش الفساد لأن الفساد أحكم قبضته على الكل
الأستاذ سمير طيب والخدمات اللى بيقدمها أبوك للناس
محمود فكرك إن الخدمات دى بيقدموها لأبويه ليه
الأستاذ سمير ليه يعنى
محمود عشان يحترمهم ويقول للناس دا فلان نضيف وعشان الناس تسكت سكوت أبو الهول
محمد أنتم عارفين إن الفساد لو وصل لقمته الناس النايمه دى هتصحا وهتقضى عليه
الحاج رمضان تعرفوا تقوموا تروحوا أنتم الاثنين وبعدين نبقى نتفاهم فى البيت بعد كده
محمد حاضر يا حاج
(يقوم محمد ومحمود ويتحركان بإتجاه بيت المضيفة خارجين)
الحاج رمضان الحمد لله
الحاج سيد أوعى كلامهم يأثر عليك يا حاج
الحاج رمضان ما تخافش يا حاج سيد دا شوية عيال ما يعرفوش المصلحة بتاعة البلد فين
الأستاذ سمير طبعا البلد فى جيبك يا حاج مش عاوزين أكتر من بلد واحدة تبقى معاك عشان النجاح
الحاج رمضان إن شاء الله النجاح مضمون أنا اتفقت مع الحاج إبراهيم وأنتم عارفين إن بلده وبلدنا أكبر بلدين فى عدد الأصوات فى الدايره
الأستاذ سمير ما تنساش يا حاج إنك قدمت خدمات لبلاد ثانيه ودا هيخلى رصيدك من الأصوات كبير إن شاء الله
الحاج سيد نقوم نروح الجامع عشان نصلى وندعى الناس
الحاج رمضان يله
المتخيل العاشر
(قاعة اجتماعات صغيرة بها مجموعة من المقاعد المرصوصة بجانب الحوائط وفى جانبها الأيمن مكتب أمامه بعض المقاعد التى يجلس عليها ثلاثة من الشباب )
هانى فكركم المرشحين بتوع حزبنا ممكن ينجحوا
السيد والله أنا أتوقع إن بعضهم سيدخل المجلس وسيكون دخوله ليس من باب النجاح وإنما من باب السياسة المرسومة
هانى تقصد إيه بكلامك
السيد أقصد إن الحزب الحاكم سيدخل بعض مرشحينا المجلس عشان يبقى فيه صورة للمعارضة خاصة بعد الساحة ما خليت من الأحزاب المعارضة الأخرى
نور وتقصد إن حزبنا هو حزب المنبوذين
السيد فكرك إن أفكار حزبنا لو عرضناها على الناس ستلقى القبول أنا أعتقد أنهم سيضربونا لو سمعوها
هانى ممكن اتهمك الآن أنك غير وفى للحزب
السيد اتهمنى كما تريد ولكن ما قلته هو الحقيقة فحزبنا عبارة عن مجموعة من الشخصيات التى تعيش فى أبراج عاجية ولا تطبق أفكار الحزب على نفسها بدليل العزب التى يمتلكونها مع أنهم اشتراكيون زد بعض النساء الشواذ نفسيا
نور صح حزبنا لا يخرج أعضائه عن أساتذة فى أبراج عاجية أو كتاب يتسولون لقمة العيش بالشتيمة والمدح أو نساء شواذ نفسيا أو شباب يبحثون عن دور لهم فى الحياة
السيد المفروض نطلق على حزبنا وعلى الأحزاب الأخرى عصابات المنتفعين بأموال الشعب كل حزب له ميزانية من أموال الشعب والشعب لا يستفيد من أى حزب مش عارف على إيه تأخد الأحزاب أموال الشعب
هانى هل تعارضون الديمقراطيه؟
السيد أنته أهبل ولا بتستهبل ؟
هانى تقصد إيه؟
السيد أقصد إن حزبنا لا يؤمن بالديمقراطية وإنما فكره الرئيسى قائم على الحزب الواحد وإذا حكمت الظروف بعض الأحزاب الصغيرة التى لا يكون لها دور على الإطلاق فى الحكم
نور أى حزب فى الدنيا يتمنى أن يحكم بلا معارضة حتى ولو أعلن إيمانه ألف مرة بالتعددية الحزبية
السيد اسمع يا هانى لا تضحك على نفسك ولا تحاول أن تفعل معنا مثل النصاب الذى دفن الكلب مع صاحبه وأقاما عليه ضريح يزوره المغفلين ثم سرق النذور وحلف قائلا وحياتك يا سيدنا الشيخ ما سرقت
نور عندما نكون مع بعضنا لا تدافع عن حزبنا وأما عندما يأتى دخيل فعليك أن تدافع
هانى هذا نفاق
نور الحزب هوه وكل الأحزاب قائمة على النفاق انظر لأى حزب ستجد أنه عبارة عن عصابة للمنتفعين منتفعين بأموال الشعب منتفعين من وسائط كبار رجال الحزب ومعارفهم
السيد المقصود إن كل عضو فى أى حزب يدخل عشان يحقق هدف له يعنى أنا مثلا دخلت عشان أعمل لنفسى طريق فى الأدب ينشر أعمالى وعشان لو وقعت فى ورطة يبقى كبار الحزب يطلعونى منها
نور انظر لكل الأحزاب ستجد أنها كلها خرجت من رحم واحد كل الكبار فى الأحزاب كانوا فى تنظيم واحد الفرق الوحيد إن كل الأحزاب تضم وزراء وقيادات سابقة والحزب الحاكم وحده يضم قيادات سابقة وحاليه
هانى نحن إذا منتفعون
نور وحزبنا يحارب الإنتفاعية أليس هو رافع شعار الفساد خلف ولاد؟
السيد وانظر حولك ستجد أن العضو الواحد تقلب فى أحضان أكثر من حزب والسبب هو أنه كلما وجد نفسه لن يصل بسرعة لدور قيادى فى حزب ما تركه لحزب أخر ليجرب حظه
نور شعار كل عضو حزبى أنا مع من يخدمنى أكثر
السيد من الممكن أن تنتقل من أقصى اليسار لأقصى اليمين أو الوسط إن أردت ذلك ولن تجد أى ضرر فذلك الإنتقال مفيد خاصة إذا انتقلت لأقصى اليمين فساعتها ستجد الصحف والمجلات اليمنية تجرى خلفك لإجراء أحاديث صحفية وليس ببعيد أن تأخذ دور قيادى
هانى هذا جنون
نور الحياة كلها جنون
السيد وإما أن تكون مجنون مثل المجانين وإما أن يقتلك المجانين
نور إن الجنون هو العقل فى هذا العصر
السيد يعنى يا إما أن تساير التيار أو يجرفك فتغرق
نور والأفضل طبعا المسايرة كما قال الشاعر
وارقص ودندن لكل قرد إذا كنت فى دولة القرود
هانى إن دوام الحال من المحال ومن المستحيل أن يدوم الجنون
السيد صحيح ذلك ولكننا لسنا من سنغير الجنون لأننا انغمسنا فيه
هانى أنا لم أنغمس فى الجنون
السيد إنضمامك للحزب دليل جنونك
نور يعنى الكثرة التى لم تدخل الأحزاب هى العاقلة
السيد ليست عاقلة وإلا لم نكن نحن موجودين وإنما عندهم بقية من العقل
نور رغم كراهيتى للمتطرفين إلا أننى أومن أنهم المغيرون للجنون لأنهم بعيدون عن الجنون ويحاربونه
السيد الشواهد تدل على أنهم القادمون للحكم عاجلا أو آجلا فهم الجماعة الوحيدة التى يزيد عددها بانتظام والجماعة الوحيدة التى تقدم خدمات بلا مقابل للناس والوحيدة التى تستعمل السلاح فى محاربة الفساد
نور وأما أحزابنا ففى سابع نومة فهم يحاربون الفساد على صفحات الجرائد والمجلات وفى الليل يذهبون للفنادق والملاهى ليأكلوا ويشربوا ويرقصوا ويغنوا
السيد يعنى كما قال الشاعر
ودار ابن لقمان باقية والقيد باق والطواشى صبيح
نور ما رأيك يا عم هانى نستشيخ ونقعد فى الجامع عشان لما الغزاة أقصد المتطرفين يقدمون نبقى معاهم نستفيد منهم أو على الأقل يرضوا عنا ولا يضرونا
السيد هؤلاء لا ينفع معهم نفاق وأحسن حل أننا نعيش على الهامش نقعد فى البيت
هانى طيب يله نقفل المقر عشان الوقت اتأخر
المتخيل الأخير
(بوابة مركز شرطة يقف عليها جنديان بسلاحهما ويقف أمام البوابة من الخارج بعض المرشحين وأنصارهم وخلف البوابة بعض أنصار المرشحين )
عسكرى خارج من البوابة )أحمد المصرى لو سمحت يا شاويش
العسكرى نعم أحمد الفرز خلص ولا لسه
العسكرى قربنا على نهاية الفرز
أحمد ما تعرفش مين خد أعلى الأصوات
العسكرى لا (يتحرك العسكرى خارج المسرح)
إمام(يمشى ذهابا وإيابا أمام البوابة )النتيجة يا رب التوفيق
هتيف إمام ريح نفسك خمس دقايق والنتيجة هتطلع
إمام الواحد عامل زى الواحدة اللى بتولد ومستنيه نزول الخلاص
هتيف إمام يا إمام بيه بأقول أحسن حاجه إننا نمشى من هنا دلوقت عشان حالتك النفسية هنا وحشة
إمام عاوزنا نروح فين يعنى .
هتيف إمام تعال بس نروح نقعد على قهوة ربع ساعة على ما تظهر النتيجة وبعدين نبقى نيجى نعرفها
إمام ماشى كلامك(يخرجان من المسرح)
الحاج حسين معقوله أننى أسقط (يتحرك من داخل البوابة لخارجها )أنا راجل الحكومه أسقط وما خدش غير ميت صوت
هتيف حسين هدى نفسك يا حاج عشان نعرف نفكر هتعمل إيه
الحاج حسين أنا صوابى طار
هتيف حسين يا حاج ممكن تتصل بالرجاله الكبار فى مصر عشان يدخلوا
الحاج حسين والله فكره ما يرضوش إن الراجل بتاعهم يسقط دور العربيه على ما أجى لك(يتحرك كل واحد منهما فى اتجاه عكس الأخر ويخرجان )
الحاج سيد يا أستاذ سمير يا أستاذ سمير
الأستاذ سمير (يتحرك من داخل البوابة لخارجها )نعم يا حاج
الحاج سيد إيه الأحوال
سمير اطمئن يا حاج الحاج رمضان هوه البريموه
الحاج سيد طمنتنى الله يطمن قلبك
سمير حاجة عظيمة هيبقى عضو لرابع مرة حاجة قليل لما بتحصل
الحاج سيد الحاج رمضان يستأهل كل خير
سمير صح راجل سكره خادم الكل ربنا يكرمه
الحاج سيد روح يا أستاذ سمير عشان تحضر بقية الفرز وأروح أنا أطمن الحاج
سمير حاضر يا حاج (يتحرك سمير لداخل البوابة والحاج سيد لخارجها )
الحاج ابراهيم(قادم من خارج المسرح)إيه الخبر يا واد يا حسنين
حسنين لسه يا با النتيجة ما ظهرتش
الحاج إبراهيم يعنى ما تعرفش مين اللى واخد أعلى الأصوات لحد دلوقت
حسنين بيقولوا الحاج رمضان
الحاج إبراهيم حاجه كويسه طيب وحسين
حسنين حسين راح فى البطاطس يا با جى فى الدلدولة
الحاج إبراهيم دا المهم
حسنين طيب ونتيجتك يا با مش مهمة
الحاج إبراهيم ما دام عمك الحاج رمضان نجح يبقى أنا نجحت دخلت المجلس ولا ما دخلتش
حسنين طيب كان ليه وجعت دماغنا وكلفتنا
الحاج إبراهيم عشان أسقط حسين وأذل نفسه عشان ما يعملش كبير البلد
حسنين طيب ما دام كده يبقى نروح أحسن من الوش اللى هنا
الحاج إبراهيم استنه شويه مش جايز الحظ يضرب وأبوك ينجح
حسنين النتيجة هتظهر وسواء عرفتها هنا أو فى الدار واحد ويمكن أحسن لو روحنا على الأقل مش هتشوف الشمتنين فيك
الحاج إبراهيم فكره كويسه يله بينا (يتحركان لخارج المسرح)
شاب1 (خارج من الداخل )الفرز خلص
شاب2 إيه النتيجة يا ترى
شاب1 الحاج رمضان وأحمد المصرى
شاب3 يا أحمد يا مصرى يا أحمد يا مصرى (يجرى أحمد المصرى باتجاه الشاب3)
أحمد المصرى فيه إيه
شاب3 مبروك يا عم نجحت أعلى الأصوات فى الدايره كلها
أحمد المصرى معقوله
شاب3 والله العظيم نجحت وخدت أعلى الأصوات
مندوب أحمد المصرى مبروك يا عضو البرلمان (وهو خارج من البوابة )
أحمد بجد ولا بتهزر
المندوب بجد طبعا هيه دى فيها هزار (يتحرك أحمد المصرى ويقفز على سور المركز ويقف عليه )
جندى الحراسة إنزل لو سمحت من على السور
أحمد مش نازل
جندى الحراسة إنزل بدل ما استعمل السلاح
أحمد مش نازل